రద్దీకి బస్సులు ఏవి..?

రద్దీకి బస్సులు ఏవి..?

ఇన్ని బస్సుల్లో ప్రయాణికుల పడగాపులు

నేటి వార్త ఆగస్టు 28 రామ్ మందిర్ ఏరియా కాశెట్టి శివ 

గోదావరిఖని: ఉమ్మడి కరీంనగర్‌ జిల్లాలోని ప్రముఖ బస్‌స్టాండ్లలో ఒకటైన గోదావరిఖని బస్‌స్టాండ్‌లో ప్రయాణికుల రద్దీ రోజురోజుకూ పెరుగుతున్నా, అందుకు అనుగుణంగా బస్సుల సంఖ్య మాత్రం పెరగడం లేదు. 

దీంతో వివిధ ప్రాంతాలకు వెళ్లేందుకు వచ్చిన ప్రయాణికులు తీవ్ర ఇబ్బందులు ఎదుర్కొంటున్నారు. ముఖ్యంగా పండుగలు, సెలవు దినాల్లో పరిస్థితి మరింత దారుణంగా మారుతోంది.

ఉద్యోగులు, విద్యార్థులు, మహిళలు, వృద్ధులు, చిన్నారులు పెద్ద సంఖ్యలో బస్‌స్టాండ్‌కు చేరుకుంటుండటంతో ప్రయాణికుల రద్దీ విపరీతంగా ఉంటోంది. 

అయితే రద్దీకి అనుగుణంగా అదనపు బస్సులను ఏర్పాటు చేయకపోవడంతో ప్రయాణికులు గంటల తరబడి బస్సుల కోసం నిరీక్షించాల్సి వస్తోంది. 

బస్సులు వచ్చిన సమయంలో ఒక్కసారిగా ప్రయాణికులు ఎక్కడంతో తోపులాటలు చోటుచేసుకుంటున్నాయి.

ప్రతి ఏడాది పండుగల సమయంలో రద్దీ పెరుగుతుందని తెలిసినా ముందస్తు ప్రణాళిక లేకపోవడంపై ప్రయాణికులు ఆగ్రహం వ్యక్తం చేస్తున్నారు. ముఖ్యంగా ప్రైవేటు వాహనాలపై ఆధారపడలేని సామాన్య ప్రజలు ఆర్టీసీ బస్సులపైనే ఆధారపడుతున్నారు. 

కానీ సరిపడా బస్సులు అందుబాటులో లేకపోవడంతో వారి ఇబ్బందులు మరింత పెరుగుతున్నాయి.

రద్దీ దృష్ట్యా ప్రత్యేక బస్సులు నడపాలని, అవసరమైన మార్గాల్లో అదనపు ట్రిప్పులు ఏర్పాటు చేయాలని ప్రయాణికులు కోరుతున్నారు. అలాగే బస్‌స్టాండ్‌లో ప్రయాణికుల భద్రత, క్రమబద్ధమైన రాకపోకలకు ప్రత్యేక చర్యలు తీసుకోవాలని విజ్ఞప్తి చేస్తున్నారు.

రద్దీ సమయాల్లో ప్రయాణికులకు ఇబ్బందులు కలగకుండా అధికారులు ముందస్తు చర్యలు చేపట్టాలని, అవసరమైన మేరకు అదనపు బస్సులు ఏర్పాటు చేయాలని ప్రజలు కోరుతున్నారు.